Píeta-húsið á sínum stað næstu tvö árin

Píeta-hús Reykjavíkur verður áfram á sínum stað við Baldursgötu 7 í miðborginni næstu tvö árin hið minnsta. Þetta var tryggt með nýjum samningi Píeta og leigufélagsins Ölmu, sem útvegar samtökunum húsnæðið ókeypis til afnota.

Þetta kemur fram í tilkynningu.

Samtökin, sem rekin eru að írskri fyrirmynd, hófu starfsemi sína á Baldursgötu vorið 2018 og er markmiðið að sinna forvarnastarfi gegn sjálfsvígum og sjálfsskaða og styðja við bakið á aðstandendum. Hundruð hafa notfært sér þjónustuna.

Til Píeta geta bæði komið einstaklingar sem glíma við sjálfsvígshugleiðingar eða sjálfsskaðavanda, sem og þeir sem hafa misst einstakling í sjálfsvígi eða óttast um sína nánustu. Öll aðstoð er endurgjaldslaus og veitt af fagfólki.

Frétt af mbl.is

Biðlisti hjá Píeta-samtökunum

Guðni Th. Jóhannesson, forseti Íslands, tilkynnti um fyrirhugaða opnun Píeta-hússins í september 2017. Þangað hefur verið mikil aðsókn allt frá opnun, en síðastliðinn nóvember myndaðist í fyrsta sinn biðlisti eftir þjónustunni.

Húsnæðið er um 100 fermetrar að stærð og er markmiðið að aðstæður séu heimilislegar og notalegar fyrir þá sem þangað sækja, að því er segir í tilkynningunni.

Frá undirritun samningsins. Ljósmynd/Aðsend

Síðasti samningur um húsnæðið var gerður í nóvember 2017 til tveggja ára og var því komið að endurnýjun. María Björk Einarsdóttir, framkvæmdastjóri Ölmu, og Kristín Ólafsdóttir, framkvæmdastjóri Píeta-samtakanna, undirrituðu nýjan samning til tveggja ára síðasta miðvikudag.

 „Aðsókn í okkar þjónustu fer stöðugt vaxandi og við fögnum því sannarlega að fleiri leiti sér aðstoðar. Okkar skjólstæðingar eru að jafnaði í viðkvæmum aðstæðum og því ómetanlegt að geta áfram boðið öruggar og notalegar aðstæður á Baldursgötunni,“ segir Kristín í tilkynningunni. „Við stöndum frammi fyrir því að þurfa að lengja afgreiðslutíma okkar út af plássleysi en Baldursgatan hefur svo sannarlega verið okkar heimili.“

Frétt af mbl.is

Gengið úr myrkrinu í ljósið í nótt

„Það hefur verið frábært að fylgjast með starfi Píeta undanfarin tæp tvö ár, þar sem fólki í viðkvæmum aðstæðum er veitt vönduð ráðgjöf og aðstoð,“ segir María Björk, framkvæmdastjóri Ölmu í tilkynningunni. „Við erum afskaplega stolt af samstarfinu og ánægð að geta tryggt áframhaldandi starfsemi Píeta-hússins, þar sem fjöldi fólks sækir þjónustu á hverjum degi.“

• Blogga um frétt