Ríkisendurskoðun þarf á auknum fjármunum að halda vegna meira álags sem verið hefur á störfum embættisins vegna skýrslna sem Ríkisendurskoðun hefur þurft að ráðast í að beiðni Alþingis og ráðuneyta.
Þetta er mat ríkisendurskoðanda að því er fram kemur í beiðni til fjárlaganefndar Alþingis um aukafjárveitingu til handa embættinu vegna yfirstandandi árs sem barst nefndinni í gegnum forsætisnefnd Alþingis.
Fjárlaganefnd Alþingis hefur óskað eftir nánari rökstuðningi á beiðni forsætisnefndar um aukafjárveitingu Ríkisendurskoðun til handa að því er fram kemur á minnisblaði.
Birt er yfirlit yfir tíu úttektir sem stofnunin hefur verið beðin um að vinna á þessu ári og nokkrar úttektir sem unnið var að eða byrjað var á á árunum 2017 og 2018, að því er fram kemur í Morgunblaðinu í dag.