Innlent | mbl | 8.12.2019 | 14:11 | Uppfært 24.1.2020 16:32

John Snorri býður almenningi á lokaæfingu fyrir K2

John Snorri Sigurjónsson á toppi K2 árið 2017. Hann ætlar að endurtaka leikinn í upphafi næsta árs og verða fyrsti maðurinn í sögunni til þess að klífa K2 að vetrarlagi. Ljósmynd/Kári G. Schram

John Snorri Sigurjónsson fjallamaður stefnir á að verða fyrsti maðurinn í sögunni til þess að klífa fjallið K2 í Pakistan að vetrarlagi og heldur upp í ferð sína í janúar. Hann er nú við æfingar og ætlar að bjóða öllum sem hafa áhuga á að taka þátt í æfingu með sér annað kvöld, en þá ætlar hann að ganga 14 ferðir upp og niður Esjuna.

Morgunblaðið ræddi við John Snorra um fyrirætlanir hans í síðasta mánuði. Þar kom fram að einungis 460 manns hefðu náð að klífa K2 frá því að það var fyrst klifið árið 1954. Í þeirra hópi er John Snorri nú þegar, en enginn hefur klifið fjallið að vetrarlagi fyrr, þótt margir hafi reynt.

Frétt af mbl.is

Ferðin er þrekraun og áhætta

Tuttugu og átta klukkutíma æfing

Æfing Johns Snorra hefst kl. 18 á morgun og reiknar hann með því að hún taki tuttugu og átta klukkutíma. Hann býður vinum og göngufólki að slást í för með sér einn og einn legg af ferðinni, en John Snorri leggur af stað upp á Esjuna með tveggja klukkustunda millibili þar til æfingunni lýkur kl. 22 annað kvöld.

Leiðangur Johns Snorra núna í janúar og atlagan að þessu heimsmeti er ekki ódýrt verkefni og kostnaðaráætlun gerir ráð fyrir 22 til 24 milljónum. Í tilkynningu um fjöldaæfinguna, sem John Snorri kallar lokaæfinguna fyrir K2, segir að hugmyndin með æfingunni sé að vekja athygli á leiðangrinum og kalla eftir aðstoð við fjármögnunina.

„Þeir sem hafa hug á að taka einn eða fleiri leggi upp með John eru sannarlega velkomnir en þurfa að hafa í huga að til að halda tíma og ljúka verkefninu á réttum tíma þarf John að fara á sínum hraða sem þó miðast við það að hann þarf að halda út 14 ferðir þannig að hann er ekki að fara á feiknahraða,“ segir í tilkynningu.

Hægt er að styrkja ferð Johns Snorra með því að leggja inn á reikning fjallamannsins.

Reikningur: 549-26-52
Kennitala: 2006735499