Stafrænt Ísland, fyrir hönd fjármála- og efnahagsráðuneytisins, hyggst standa fyrir útboði sem skila á rammasamningum fyrir allt að átján teymi frá fyrirtækjum.
Markmiðið er að teymin vinni með Stafrænu Íslandi að því að bæta þjónustu á island.is fyrir einstaklinga og fyrirtæki. Kynningarfundur fyrir áhugasöm fyrirtæki verður haldinn mánudaginn 16. desember.
Þetta kemur fram í tilkynningu.
Útboð verkefnanna er liður í aðgerðaáætlun ríkisstjórnarinnar um eflingu stafrænnar þjónustu. Unnið er að því að Ísland verði á meðal þeirra fremstu í heiminum þegar kemur að stafrænni stjórnsýslu og opinberri þjónustu.
Teymin munu vinna í samvinnu við Stafrænt Ísland og stofnanir að verkefnum fyrir island.is, sem er miðlæg þjónustugátt. Verkefnin snúa að þróun á stafrænni þjónustu.
Útboðið felur í sér ríkar hæfis- og gæðakröfur en áhersla er jafnframt á að gera minni aðilum kleift að taka þátt. Gert er ráð fyrir að heildarumfang verkefna næstu tvö árin geti orðið allt að 60.000 klukkustundir með fyrirvara um fjárveitingar til verkefnanna.