„Tónlistarhefðin hér í uppsveitum Árnessýslu er sterk, margir taka þátt í kórstarfi og hér eins og víða úti á landi er kirkjan stór þáttur í félagslegu starfi,“ segir Jón Bjarnason organisti í Skálholtskirkju.
Hann er raunar gott betur því hann sér um tónlistarstarf í tíu af tólf kirkjum Skálholtsprestakalls sem nær yfir Biskupstungur, Grímsnes og Laugardal og Þingvallasveit.
Í flestum kirknanna þar verður helgihald nú um hátíðarnar og engin er messan án organleiks og söngs. Kórarnir í prestakallinu eru tveir, Skálholtskórinn og Söngkór Miðdalskirkju. Strax í október er byrjað að æfa jólalögin sem sungin verða tær og hrein.
Að leika á hljóðfærið við um það bil 20 athafnir um jól og áramót, á til þess að gera fáum dögum, kallar á góðan undirbúning og skipulag. „Við sr. Egill Hallgrímsson sóknarprestur vinnum þetta vel saman,“ segir Jón m.a. í samtali í Morgunblaðinu í dag.