Sigurður Ingi Jóhannsson, samgöngu- og sveitarstjórnarráðherra, segir að áföll á borð við gjaldþrot WOW air í fyrra hafi sýnt fram á styrk samfélagins en að önnur áföll, svo sem ofsaveður sem geisaði í desember á síðasta ári, hafi afhjúpað veikleika þess.
Þetta kom fram í ræðu Sigurðar á fyrsta þingfundi Alþingis eftir jólahlé í dag, þar sem leiðtogar stjórnmálaflokka fóru yfir um stöðuna í stjórnmálunum.
Sagði Sigurður að þegar allt gengi vel og allar ytri aðstæður væru hagfelldar yrði það stundum þannig að við gleymdum að tryggja okkur gagnvart erfiðari tímum. Nefndi hann í því samhengi raforkumálin og sagði hann að umræða um raforkumál á Íslandi hefði síðustu ár snúist um að nóg hefði verið gert í þeim málum og sagði að að mörgu leyti hefði verið talað um raforkuna sem einhvern „óþarfa lúxus“.
Ferðir um Norðurland eftir óveðrið í desember hefðu þó sýnt fram á að fólk hefði fundið fyrir óöryggi.
Sagði Sigurður ríkisstjórnina nú vera í stakk búna til að gera áætlanir að úrbótum til lengri og skemmri tíma vegna þess jafnvægis sem ríkisfjármálin hefðu náð, og standa við þær.
Þá kom Sigurður inn á tillögur að breytingum á stjórnarskrá lýðveldisins og sagði auðlindaákvæðið vera eitt það mikilvægasta þar.
Fullyrti hann að íslenskur sjávarútvegur væri í fremstu röð í heiminum hvað varðaði ábyrga og sjálfbæra nýtingu auðlinda hafsins og sagði grundvöllinn að þeirri ábyrgu nýtingu vera kvótakerfið.
Sagði hann Framsókn leggja mikla áherslu á ákvæði um að auðlindir yrðu hluti af stjórnarskránni til að tryggja eignarrétt þjóðarinnar á auðlindum í sjó og á landi.