Raforkukerfið á Vestfjörðum komst í eðlilegan rekstur um kl. 21 í kvöld, en þar hafa verið miklar rafmagnstruflanir í dag og víða þurft að keyra á varaafli.
Rafmagnslaust var í öllum Önundarfirði lungann úr deginum, en selta hlóðst upp í tengivirki Landsnets í Breiðadal og var það því órekstrarhæft. Slökkviliðið á Ísafirði var fengið til þess að hreinsa tengivirkið.
Töluverðan tíma tók að koma á rafmagni á Flateyri, þar sem bilun var í varavél þar og því þurfti að flytja færanlegar varaaflsvélar til bæjarins.