Hætta eftir 26 ára samfellda útgáfu

Útgáfu frítímaritsins Myndir mánaðarins hefur verið hætt eftir 26 ára samfellda mánaðarlega útgáfu. Ljóst er að margir syrgja tímaritið, en eftir að tilkynnt var um tímamótin á facebooksíðu þess hafa athugasemdirnar hrúgast inn frá dyggum lesendum sem þakka fyrir samfylgdina í gegnum árin með sorg í hjarta.

Stefán Unnarsson, ábyrgðarmaður Mynda mánaðarins, segir ástæðuna fyrir endalokunum vera breytt landslag á auglýsingamarkaði. Það hafi þó ekki enn verið farið að halla undan fæti. „Blaðið gekk allan tímann mjög vel og það voru aldrei nein vandamál, þannig séð. Það er bara breytt landslag á auglýsingamarkaði fram undan og það er betra að stoppa meðan hlutirnir eru í lagi; ekki halda áfram og verða strand. Dreifingin gekk mjög vel og blaðið kláraðist alltaf í hverjum mánuði,“ segir Stefán, en upplagið var 20 þúsund eintök og tímaritið einnig aðgengilegt á netinu.

Það voru aðeins þrír sem komu að útgáfunni; einn blaðamaður sem setti einnig upp blaðið, prófarkalesari og svo Stefán sjálfur sem sá um dreifingu, auglýsingar og yfirumsjón.

„Það var hvergi til sparað í gæðum“

Hann segir vissulega leiðinlegt að hætta útgáfu en er þó alls ekki með sorg í hjarta. Hann er frekar ánægður með gott starf í gegnum tíðina. „Ég er ánægður yfir að hafa geta boðið upp á glæsilegt tímarit, að fullu sambærilegt við seld tímariti. Það var hvergi til sparað í gæðum, pappírinn var góður og það fannst ekki stafsetningarvilla í blaðinu.“

Stefán hefur nú mestar áhyggjur af hnignun íslenskunnar en hann segir kennara hafa notað blaðið við kennslu. „Nú þurfa börnin að nálgast upplýsingar um kvikmyndir á ensku, að miklu leyti. Það truflar mig mest.“

• Blogga um frétt