Hæstaréttardómararnir Greta Baldursdóttir og Þorgeir Örlygsson hafa sótt um lausn frá embætti. Þetta var kynnt á ríkisstjórnarfundi í dag.
Þau verða fimmtu dómararnir við réttinn til að hætta á innan við einu ári, en þeir Markús Sigurbjörnsson og Viðar Már Matthíasson fengu lausn frá embætti 1. október og Helgi Ingólfur Jónsson óskaði eftir lausn í janúar.
Greta er fædd árið 1954 og varð 66 í mars. Hún starfaði hjá yfirfógeta í Reykjavík og var settur borgarfógeti áður en hún hóf störf við Héraðsdóm Reykjavíkur, fyrst sem dómarafulltrúi og síðar dómari. Árið 2011 var hún skipuð í Hæstarétt.
Þorgeir er núverandi forseti Hæstaréttar. Hann er fæddur árið 1952 og hefur verið dómari við réttinn frá því árið 2011. Hann starfaði við embætti yfirborgardómarans í Reykjavík áður en hann varð aðstoðarmaður hæstaréttardómara og síðar borgardómari í Reykjavík. Þá var hann prófessor við Háskóla Íslands og dómari við EFTA-dómstólinn frá 2003-2011.
Greta og Þorgeir voru elstu dómarar við réttinn, en eftir að þau láta af störfum verður Ingveldur Einarsdóttir sú elsta, en hún er fædd árið 1959.