Nokkrar annir hafa verið hjá björgunarsveitum á Hellu, Hvolsvelli og undir Eyjafjöllum í dag. Í morgun leituðu þær og fundu erlendan göngumann sem var í hrakningum á Fimmvörðuhálsi. Sá var kaldur og hrakinn eftir vinda- og rigningarsama nótt.
Að sögn Slysavarnafélagsins Landsbjargar fannst maðurinn nokkuð fljótt og fékk aðhlynningu hjá björgunarfólki.
Nú eftir hádegið voru björgunarsveitirnar aftur kallaðar út vegna ferðamanna sem nú voru fastir í Krossá. Með liðsinni öflugs traktors Ferðafélagsins í Þórsmörk tókst að bjarga þeim í land áður en illa fór, að því er Landsbjörg greinir frá.
Vert er að ítreka að ár á Suðurlandi og hálendi hafa vaxið mikið síðustu daga.