Lundinn er í endursköpun

„Nú gefst andrými til að endurskapa ímynd lundans,“ segir Elín Elísabet Einarsdóttir listamaður.

Þær Elín og Rán Flygenring samstarfskona hennar standa að Nýlundabúðinni í Hafnarhólma á Borgarfirði eystra sem opnuð var í gær í fuglaskoðunarhúsinu á staðnum.

Mikið lundavarp er á þessum slóðum eystra og í búðinni góðu eru munir unnir á staðnum. Starfsmenn lundabúðarinnar rannsaka þar hlutverk lundans og þó svo að ekkert sé til sölu og aðgangur gesta bannaður vegna veiruvarna fer fram blómleg starfsemi í teikningu, rannsóknum og ímyndarsköpun. Verkefni þetta er stutt af Brothættum byggðum, verkefni Byggðastofnunar, og Hönnunarsjóði Íslands.

„Lundinn hefur um margt verið táknmynd túristavæðingarinnar á Íslandi og það gjarnan undir neikvæðum formerkjum.Við ætlum að gera tilraun til þess að gera lundabúðina töff,“ segir Elín. Nýlundabúðin verður ekki opin í hefðbundinni merkingu, en hana má heimsækja á vefsetrinu instagram.com/nylundabudin fram í miðjan ágúst, eða á þeim tíma sem verslunin er starfrækt.