Braut kynferðislega á barnungri frænku sinni

Karlmaður var dæmdur til níu mánaða fangelsisvistar og greiðslu 800.000 króna í skaðabætur í Héraðsdómi Reykjaness í gær fyrir að hafa brotið kynferðislega á barnungri frænku sinni þegar hún var sex og sjö ára gömul. Ári áður hafði maðurinn játað að hafa brotið kynferðislega á systur sinni frá því að hún var níu ára og þangað til hún varð ellefu ára gömul. 

Mæður mannsins og frænku hans sem hann braut á eru systur. Þá var systir mannsins, sú sem hann játaði að hafa brotið á, góð vinkona frænkunnar sem maðurinn braut einnig á. Vegna vinkvennasambandsins var frænkan tíður gestur á heimili mannsins sem braut á henni. 

Síðla árs 2018 vaknaði grunur um að maðurinn hefði framið kynferðisbrot gegn systur sinni. Hún sagði að brotin hefðu verið framin á heimili þeirra og fólust annars vegar í því að ákærði kitlaði hana á daginn og káfaði í framhaldi á brjóstum hennar og hins vegar í því að ákærði færi inn til hennar að næturlagi, tæki niður nærbuxur hennar og káfaði á kynfærum hennar.

Frestuðu kæru í máli systurinnar

Málið sætti lögreglurannsókn og gekkst maðurinn við því að hafa í nokkur skipti káfað á kynfærum systur sinnar.

„Í framhaldi ákvað Héraðssaksóknari 20. ágúst 2019 að fresta útgáfu ákæru skilorðsbundið í þrjú ár,“ segir í dómnum. 

Aðeins nokkrum mánuðum síðar eða þann 14. nóvember á síðasta ári barst lögreglu tilkynning um að grunur léki á að maðurinn hefði brotið á frænku sinni. Stúlkan hafði þá sagt félagsráðgjafa að hún ætti vont leyndarmál sem hún hefði ekki þorað að segja neinum frá. Hún sagði að maðurinn hefði oft snert kynfæri hennar innan og utan klæða. Hann byrjaði á því að kitla hana og færði svo hönd sína neðar. Stúlkan sagði að maðurinn hefði síðast brotið á henni árið 2018. 

Braut á henni í hvert einasta skipti

Við skýrslutöku sagðist stúlkan ekki muna hvenær brotin áttu sér fyrst stað en hún hafi þá líklega verið í fyrsta eða öðrum bekk grunnskóla. Stúlkan sagði að maðurinn hefði brotið á henni í hvert einasta skipti sem hún kom á heimili mannsins. 

„Hún kvaðst ekki muna hversu oft hún fór þangað, en það hafi verið „rosa oft,“ segir í dómnum. 

Stúlkan sagði að hún hafi verið hrædd, leið og reið á meðan brotunum stóð. Þá væri hún „smá hrædd“ við manninn og liði ekki vel í návist hans. 

„Hún kvaðst gera sér grein fyrir því að þetta væri ekki í lagi, en ekki sagt neinum frá af ótta við að ákærði færi í fangelsi og það vildi hún ekki,“ segir í dómnum. 

Bar fyrir sig slæmt minni

Stúlkan vissi af því að maðurinn hefði einnig brotið á systur sinni. Þær frænkurnar hefðu skipst á þeim upplýsingum fyrir einhverju síðan. 

Þegar maðurinn var spurður út í brotin gegn frænku hans sagðist hann ekkert muna um slík brot og neitaði sök.

„Hann kvaðst ekkert muna eftir þessu og bar því við að hann hefði slæmt minni. Þá var borin undir ákærða sú frásögn brotaþola að þetta hafi byrjað þegar hún var 6-7 ára, gerst í nærri hvert einasta skipti sem hún kom heim til hans og ekki hætt fyrr en hann hefði flutt út af heimilinu. Hann svaraði: „Já, ég veit ekki.“ og neitaði svo allri sök. Ákærði kvaðst muna eftir að hafa kitlað brotaþola þegar hún var yngri, en „bara á þessum venjulegu stöðum sem maður kitlar fólk, undir höndunum, maganum og hérna neðan á læri á þarna hnéskelinni og á tásunum,“ segir í dómnum. 

Þar kemur fram að maðurinn hafi verið lagður inn á geðdeild að kvöldi 10. janúar 2019 eftir sjálfsvígstilraun. Fyrr um daginn hafði lögregla yfirheyrt hann vegna brotanna. Í samtali við sálfræðing sagðist hann ekki muna eftir brotunum en að hann væri með fullkomna stjórn á sér í dag og ekki hræddur um að „þetta gerist aftur,“ eins og það er orðað í dómnum. 

„[Maðurinn] mældist með greind í meðallagi og alvarlegt þunglyndi. Í niðurstöðum geðrannsóknar segir að ákærði sé með greinilegt samviskubit og sektarkennd gagnvart því sem hann gerði systur sinni. Ekkert bendi þó til þess að ákærði sé haldinn barnagirnd og virðist hann hafa náð fullri stjórn á hvötum sínum gagnvart stúlkunni,“ segir í dómnum þegar fjallað er um geðmat sem maðurinn undirgekkst. Geðlækninum þótti „mjög vafasamt“ að manninum yrði refsað. 

Ekkert tilefni til rangra sakargifta

Framburður stúlkunnar, frænku mannsins, var talinn trúverðugur og greinargóður en framburður mannsins ótrúverðugur.

„Að þessu sögðu telur dómurinn að leggja beri til grundvallar trúverðugan framburð brotaþola, sem fær stoð í vitnisburði systur ákærða og félagsráðgjafa, enda ekkert fram komið í málinu sem gæti hafa gefið brotaþola tilefni til að bera rangar sakir á náfrænda sinn, sem henni þykir enn vænt um. Er þannig sannað, svo hafið sé yfir skynsamlegan vafa, að ákærði hafi áreitt brotaþola kynferðislega í nokkur skipti, á heimili sínu, með því að strjúka henni utanklæða um maga og kynfæri og í eitt skipti snert kynfæri hennar innanklæða, svo sem honum er gefið að sök í ákæru og þykir háttsemin þar rétt færð til refsiákvæða,“ segir í dómnum.

Dómurinn í heild sinni.

• Blogga um frétt