Björgunarsveitir aðstoðuðu í gær tvær konur sem höfðu slasast á göngu við Ljósufjöll á Snæfellsnesi.
Hafsteinn Ingi Viðarsson, hjá björgunarsveitinni Lífsbjörg, segir í samtali við mbl.is að konurnar hafi verið í gönguhópi þegar þær runnu niður hlíð. Slysið var ekki alvarlegt en þó nóg til þess að þær gátu ekki gengið vegna áverka.
Mikil þoka var á svæðinu og klaki í hlíðinni. Vegna þess hve lágskýjað var komst þyrla gæslunnar ekki á svæðið en hópar björgunarsveita ásamt sjúkraflutningamönnum fóru á beltatækjum, fjórhjólum, sexhjólum og bíl Lífsbjargar.
Fluttu þeir konurnar neðar í fjallgarðinn þar sem þyrla Gæslunnar gat lent og flutt þær suður til Reykjavíkur.