Gossvæðinu lokað klukkan 21

Lokað verður fyrir aðgengi að gossvæðinu í Geldingadölum klukkan 21 í kvöld og stefnt að því að rýma svæðið fyrir miðnætti. Opnað verður aftur fyrir aðgang á hádegi á morgun.

Síðustu vikur hefur gossvæðið jafnan verið opið frá morgni til klukkan 18, en Otti Sigmarsson, björgunarsveitarmaður í Grindavík, segir í samtali við mbl.is að nú sé verið að prófa nýtt aðgangstímabil.

Frétt af mbl.is

Mæta óskum um að sjá eldgosið í myrkri

„Það einfaldar vaktaskipulagið að opna upp úr hádegi og með því að hafa opið lengur gefst frekar tækifæri til að sjá svæðið í ljósaskiptunum, sem er það sem margir vilja,“ segir Otti. Sól sest í Grindavík skömmu fyrir klukkan 21 þessa dagana og því tækifæri til að sjá gosið bæði í björtu og myrkri fyrir þá sem vilja.

Um 20 björgunarsveitarmenn standa vaktina á gosslóðum í bland við lögregluþjóna. Otti segir að vel hafi gengið að manna vaktir og sveitir víðs vegar að af landinu tekið þátt. Aðsókn á gossvæðið í dag hefur verið heldur mátuleg og allt gengið vel að hans sögn.

• Blogga um frétt