Tvær konur hafa stigið fram og greint frá að hafa orðið fyrir ofbeldi af hálfu Sölva Tryggvasonar dagskrárgerðarmanns og hefur önnur konan kært hann til lögreglu. Þetta kemur fram í yfirlýsingu sem lögfræðingur kvennanna sendi frá sér og fjallað var um á vef Fréttablaðsins.
Í yfirlýsingunni segir að önnur kvennanna hafi orðið fyrir meintu ofbeldi á heimili sínu hinn 14. mars síðastliðinn og lögregla hafi mætt á vettvang. Í kjölfarið var Sölvi færður á lögreglustöð.
Hin konan kveðst hafa verið beitt ofbeldi í júní í fyrra.
Sú segist hafa kynnst Sölva á stefnumótaforritinu Tinder og í kjölfar þess tjáði hún honum að hún héldi úti OnlyFans-síðu. Sölvi á þá að hafa boðist til þess að koma fyrir í myndbandi með konunni á OnlyFans-síðu hennar, þar sem ekki sæist í andlit hans, en konan sagðist þá einungis vinna með fólki sem hún þekkti og treysti. Þá hitti konan Sölva á heimili hans þar sem ætlunin var að spjalla og kynnast en svo fór, að því er fram kemur í yfirlýsingunni, að hann braut á henni kynferðislega.
Á síðustu dögum hefur Sölvi verið á milli tannanna á fólki vegna ásakana um að hafa beitt konu líkamlegu ofbeldi.
Sölvi vísar þeim ásökunum á bug og hefur birt mynd úr málaskrá lögreglu þar sem fram kemur að hann hafi ekki verið handtekinn fyrir ofbeldisbrot á tímabilinu 1. apríl til 3. maí.