Ekkert lát er á vonskuveðrinu sem herjar nú á landsmenn en gular veðurviðvaranir taka á ný gildi á hádegi á morgun. Þegar eru í gildi gular viðvaranir á stærstum hluta landsins í dag, en þær ganga svo niður í nótt.
Veðurstofa Íslands spáir 15 til 23 m/s og talsverðri rigningu. Aukið álag verður á fráveitukerfi og er fólki bent á að huga að niðurföllum og ganga frá lausum munum.
Á Faxaflóa, Suður- og Suðausturlandi er varað við snörpum vindhviðum við fjöll sem geta verið varhugaverðar fyrir vegfarendur.
Á miðhálendinu verður suðaustan og sunnan 20 til 25 m/s. Snjókoma verður og síðar slydda eða rigning og verður ekkert ferðaveður.
Síðdegis taka gildi veðurviðvaranir fyrir Breiðafjörð, Vestfirði, Strandir og Norðurland vestra.