„Það var ægileg tilfinning að sjá snjóflóðið koma æðandi, en eftir að það skall á mér vissi ég ekki meira. Ég sópaðist með því 30-40 metra, því að þegar ég kom upp var ég töluvert langt fyrir neðan veginn. En þegar ég stöðvaðist var ég á kafi í snjó. Ég var þó svo heppinn að ég lá réttur og sá glitta í himininn fyrir ofan mig. Ég átti tiltölulega auðvelt með að rífa mig upp úr snjónum, en þegar ég kom upp vissi ég ekki hvar ég var, það var allt breytt, ekkert nema sléttur snjór allt í kring,“ sagði Ásmundur Eiríksson, ungur Norðfirðingur, við blaðamann Morgunblaðsins föstudaginn 20. desember 1974, daginn sem snjóflóðin mannskæðu féllu á byggðina í Neskaupstað, en ummælin birtust á forsíðu blaðsins morguninn eftir.