Heyrði miklar sprengingar fyrir utan

Hrafnhildur Gísladóttir, íbúi í Engihjalla 17, segir í samtali við mbl.is að henni hafi brugðið þegar eldur kviknaði í bíl á bílastæði blokkarinnar í nótt.

Einn var fluttur á slysadeild með reykeitrun og fimm bílar eyðilögðust.

„Ég heyrði svo miklar sprengingar fyrir utan,“ segir Hrafnhildur en hún var við það að sofna þegar eldurinn braust út. Í fyrstu hafi hún haldið að um flugelda væri að ræða en svo reyndist ekki þegar lögreglan bað íbúa að yfirgefa bygginguna vegna elds.

Frétt af mbl.is

Fimm bílar eyðilögðust í eldi við Engihjalla

„Svo héldum við nágrannarnir bara utan um hvert annað umvafin teppi,“ segir Hrafnhildur og bætir við að íbúarnir hafi verið í góðum höndum hjá lögreglunni og slökkviliðinu.

Aðspurð segist Hrafnhildur hafa fundið fyrir ótta í fyrstu. „Maður var hræddur“ segir hún en svo hafi hún róast þegar íbúum var hleypt aftur heim til sín.

• Blogga um frétt