Ársverkum ríkisstarfsmanna fjölgaði um 3.356

Ársverkum ríkisstarfsmanna hefur fjölgað um alls 3.356 frá árinu 2012 eða um 20%. Frá 2012 til 2015 stóð fjöldi ríkisstarfsmanna nokkurn veginn í stað og hefur því nær öll þessi fjölgun ríkisstarfsmanna átt sér stað á árunum eftir 2015. Kemur þetta fram í nefndaráliti meirihluta fjárlaganefndar við fjármálaáætlunina en nefndin aflaði sér þessra upplýsinga.

Frétt af mbl.is

Opinberum störfum fjölgað um 7.300 ekki 9.000

Mest fjölgar hjúkrunarfræðingum

„Mesta fjölgunin er hjá hjúkrunarfræðingum, eða 630 ársverk sem er 40% aukning. Háskólakennurum og prófessorum fjölgar einnig umtalsvert eða um 581, eða 50%, og háskólamenntuðum félagsvísindamönnum og náttúrufræðingum fjölgar samtals um 576 manns sem einnig er 50% fjölgun. Þá fjölgaði háskólamenntuðu starfsfólki Stjórnarráðsins um 350 manns en á móti vegur fækkun annarra starfsmanna. Samtals fjölgar starfsfólki Stjórnarráðsins um 425 manns eða 59%,“ segir í nefndarálitinu.

Hjá ýmsum öðrum stéttarfélögum hefur fjölgun ríkisstarfsmanna frá 2012 verið mun minni, s.s. hjá félagsmönnum SFR, sem árið 2019 sameinaðist Starfsmannafélagi Reykjavíkurborgar í Sameyki, en þeim fjölgaði frá 2012 um 5%. Sjúkraliðum fjölgaði á þessu tímabili um 20%. Þá kemur fram að ársverkum lögreglumanna fjölgaði úr 667 í 870 eða um 30%. Helmingur aukningarinnar á tímabilinu skýrist af fjölgun starfsfólks sjúkrahúsa og hjá heilsugæslunni.

Nán­ari um­fjöll­un má finna í Morg­un­blaðinu í dag.