Ráðherra sprengdi í Almannaskarði

Sturla Böðvarsson samgönguráðherra setti af stað fyrstu sprenginguna í Almannaskarðsgöngum kl. 14 í dag að viðstöddu fjölmenni.  Það er norska verktakafyrirtækið Leonhard Nielsen og Sønner sem sér um borun ganganna en aðalverktaki er Héraðsverk hf. 

Göngin verða boruð sunnan megin frá og á meðan verða byggður vegskáli að norðanverðu.  Þegar bormenn verða komnir í gegn færir vegskálaflokkurinn sig og byrjar á skála að sunnanverðu. 

Um leið verða göngin fóðruð og vatnsvarin og byrjað á vegagerð og lagnavinnu í göngunum. Efnið sem kemur úr göngunum verður nýtt í fyllingar undir veginn að sunnanverðu.

Jarðgöngin verða 1.146 m löng, steinsteyptir vegskálar 162 m og vegagerð um 4,1 km.

• Blogga um frétt