Ragnar Axelsson átti blaðaljósmynd ársins 2004

Mynd Ragnars Axelssonar, ljósmyndara Morgunblaðsins, sem ber yfirskriftina: Er einhver heima?, var útnefnd mynd ársins 2004 þegar sýning blaðaljósmyndara var opnuð í Gerðarsafni í Kópavogi í dag. Brynjar Gauti Sveinsson, sem einnig er ljósmyndari á Morgunblaðinu, átti fréttamynd ársins sem tekin var í aðdraganda þess að Þórólfur Árnason sagði af sér sem borgarstjóri, og Sverrir Vilhelmsson, Morgunblaðinu, átti myndröð ársins, myndir sem teknar voru á Taílandi af afleiðingum náttúruhamfaranna miklu við Indlandshaf í desember.

Verðlaun voru veitt fyrir ýmsa fleiri myndaflokka og er hægt að skoða verðlaunamyndirnar hér fyrir neðan fréttina. Í dómnefnd sýningarinnar sátu Bjarni Eiríksson fréttaljósmyndari og lögfræðingur, Friðrik Friðriksson kvikmyndagerðarmaður á Stöð 2 og Ari Sigvaldason fréttamaður Ríkissjónvarpsins.

Ólafur Ragnar Grímsson, forseti Íslands, opnaði sýningu blaðaljósmyndara í dag og einnig sérstaka sýningu á myndum Ragnars Axelssonar, sem ber yfirskriftina Framandi heimur. Þar sýnir Ragnar myndir sem almenningur hefur ekki séð áður, þar á meðal frá Eistlandi, Lettlandi og Litháen um það leyti sem Sovétmenn voru að sleppa tökum á landinu, Krakatá í Indónesíu og Síberíu.

Í tengslum við sýninguna er í fyrsta sinn gefin út bók með myndum ársins 2004 á vegum Blaðaljósmyndarafélags Íslands. Bókin er tæplega 200 síður í lit en áformað er að slík bók komi út á hverju ári jafnhliða sýningu félagsins og verði seld í verslunum um land allt. Í bókinni eru allar myndirnar á sýningunni í Gerðarsafni og eru myndatextar jafnt á ensku sem íslensku. Íslandsbanki er aðal styrktaraðili þessarar bókar ásamt menningarsjóði Blaðamannafélags Íslands.

Ljósmyndasýningin verður opin í Gerðarsafni fram í miðjan mars.

Heimasíða Blaðaljósmyndarafélags Íslands