„Samræður menningarheima“ er yfirskrift ráðstefnu sem hófst í gær og haldin er til heiðurs Vigdísi Finnbogadóttur í tilefni af 75 ára afmæli hennar á morgun, 15. apríl. Ráðstefnan, sem er alþjóðleg, fjallar um tungumál og menningarlegan fjölbreytileika og er haldin á Íslandi.
Í tengslum við ráðstefnuna var afhjúpuð brjóstmynd af Vigdísi, sem mun standa í Háskóla Íslands, að því er fram kemur í tilkynningu skipuleggjenda.
„Í samstarfi við Stofnun Vigdísar Finnbogadóttur stendur Norræna ráðherranefndin fyrir málþingi á meðan á ráðstefnunni stendur, undir heitinu „Tungumál og menningarlegur fjölbreytileiki. Skráning og nýting gagna sem tengjast tungumálum og menningu,” að því er segir í tilkynningunni.
Meðal fyrirlesara á ráðstefnunni verða japanska þingkonan Shinako Tsuchiya, sem meðal annars mun ræða um stöðu kvenna í Japan. Á morgun flytur Mary Robinson fyrrverandi forseti Írlands fyrirlestur sem nefnist „The Power of Dialogue”.
„Vigdís Finnbogadóttir sem einnig er góðgerðasendiherra UNESCO fyrir tungumál heims, hefur látið til sín taka í baráttunni fyrir því að fólk geri sér grein fyrir mikilvægi fjölbreytileika tungumála og hve mikilvægt það er að standa vörð um tungumál í útrýmingarhættu.“