Belgísk kona pakkaði kúrdískum elskhuga sínum niður í ferðatösku og reyndi að smygla honum í töskunni til Ítalíu.
Tollverðir stöðvuðu konuna, sem er 23 ára gömul, þar sem hún var að bisa við töskuna í hafnarborginni Brindisi eftir að hafa komið þangað með ferju frá Grikklandi. Þegar tollverðirnir opnuðu töskuna urðu þeir að vonum furðu lostnir þegar þeir fundu þar 26 ára gamlan karlmann. „Það liggur greinilega ástarævintýri þarna að baki," sagði Alberto D'Alessandro, aðstoðartollstjóri í Brindisi. Karlmaðurinn var sendur aftur til Grikklands með næstu ferju en konan var handtekin og ákærð fyrir að skipuleggja ólöglegan innflutning fólks.