Hlerunin sett á símreikninginn

Þýskir lögreglumenn voru nokkuð rjóðir í vöngum þegar þeir viðurkenndu að grunaðir sakamenn hefðu komist að því að símar þeirra voru hleraðir vegna þess að það kom fram á símreikningunum.

Tæknibilun varð þess valdandi að á símreikningum nokkurra meintra sakamanna var skráð gjald fyrir tengingu við óþekkt talhólf. Þegar þeir hringdu í númer talhólfsins var þeim sagt að þeir hefðu ekki aðgang að talhólfinu. Ástæðan var sú að lögreglan notaði talhólfið til að hlera símtöl mannanna.

„Bilunin varð þegar við settum upp nýjan hugbúnað," sagði talsmaður farsímafélagsins O2.

Ekki er ljóst hvaða áhrif þetta hefur haft á rannsókn lögreglu á málum mannanna en talsmaður lögreglu sagði að nokkrir tugir manna hefðu átt þarna í hlut.

Lögregla í Þýskalandi beitir símhlerunum mjög sjaldan og þá aðeins ef verið er að rannsaka alvarlega glæpi á borð við morð, peningaþvætti, mannrán og landráð. Þó hafa hleranir aukist eftir hryðjuverkaárásirnar á Bandaríkin í fyrra.

• Blogga um frétt