Meðmælendalista Íslensku þjóðfylkingarinnar vegna framboðs flokksins í Suðurkjördæmi verður vísað til lögreglu. Þetta staðfesti Ólafía Ingólfsdóttir, formaður kjörstjórnar Suðurkjördæmis, í samtali við mbl.is og sagði ákvörðunina hafa verið tekna á fundi yfirkjörstjórnar Suðurkjördæmis nú síðdegis.
Meðmælendalistum allra fjögurra framboðslista Íslensku þjóðfylkingarinnar fyrir þingkosningarnar eru því komnir til lögreglunnar.
Flokkurinn hafði ætlað að bjóða fram í fjórum kjördæmum, en dró framboðslista sína til baka á föstudag eftir að í ljós kom í stikkprufum að margir sem voru á meðmælendalistum könnuðust ekki við að hafa mælt með framboðinu.
Listum flokksins í Reykjavíkurkjördæmi Norður og -Suður og í Suðvesturkjördæmi var vísað til lögreglu í gær. Ólöf segir ekki enn búið að koma meðmælendalistanum til lögreglu en að það verði gert á næstu dögum.
Mbl.is greindi frá því fyrr í dag að fólk geti kannað í pósthólfi sínu á mínum síðum á Ísland.is hvort að nafn þess hafi verið skráð á meðmælendalista einhvers framboðanna sem hugðust bjóða fram til Alþingis þann 28. október 2017.
Alls voru 25.669 kennitölur skráðar inn í rafrænt meðmælendakerfi á Ísland.is en þar af voru 1536 skráningar ógildar eða 5,98% vegna þess að viðkomandi var skráður á fleiri en einn meðmælendalista.
Ef fólk telur að ranglega farið með undirskrift sína er það vinsamlegast beðið um að samband við yfirkjörstjórn í sínu kjördæmi.