Mick Jagger, söngvari Rolling Stones, hefur heitið því að styðja við bakið á frænda sínum, sem er eiturlyfjasjúklingur og dvelur í fangelsi næstu 12 mánuði eftir innbrot. Jagger telur að fangelsisdvölin verði ekki til þess að frændi sinni komist yfir eiturlyfjafíkn sína.
John Jagger, 24 ára, braust inn á heimili dómara í Lundúnum þar sem hann komst yfir þrjú kreditkort, farsíma, lykla, gleraugu og skjalatösku. Hann komst undan um glugga á efstu hæð hússins, en skildi eftir sig fingraför sem leiddu til þess að hann var handtekinn, að sögn ananova.com. Mick Jagger sagðist vera undrandi á dóminum þar sem John hafi ekki fengið leyfi til þess að ljúka við meðferð sína.
"John hefur reynst duglegur í baráttu við vandamál sín og því er dómurinn áfall. Fjölskyldan ætlar hins vegar að styðja heilshugar við bakið á honum," segir Jagger.