Það er aldrei of seint að hefja nám til stúdentsprófs ef marka má 82 ára gamla norska konu sem varð nýlega stúdent við menntaskólann í Tromsö. Hún heitir Edith Charlotte Antonsen og er elst Norðmanna til að útskrifast sem stúdent.
Edith Charlotte sagði að það hafi verið mjög gaman að setjast á skólabekk með mun yngra fólki og það hafi aldrei verið neitt vandamál. Þeir yngri voru alltaf tilbúnir að aðstoða hana þegar hún þurfti á því að halda.
Hún vann sem sjúkraliði í Tromsö þar til hún hætti að vinna 74 ára gömul. Í stað þess að setjast í helgan stein hóf hún nám í menntaskólanum í Tromsö og hefur nú lokið þaðan stúdentsprófi. Spurningin er hvort hún hyggi nú á frekara nám.