Taha Yassin Ramadan, varaforseti Íraks, segir að George W. Bush, forseti Bandaríkjanna, og Saddam Hussein, forseti Íraks, eigi að útkljá deilumál sín í einvígi, að því er fram kom í sjónvarpsviðtali við Ramadan í dag. "Bush vill ráðast á Írak, her landsins og uppbyggingu hans. Því ekki að láta forseta Bandaríkjanna og sérvalinn hóp Bandaríkjamanna mæta forseta Íraks og sérvöldum hópi Íraka í einvígi," sagði Ramadan.
"Við mundum velja hlutlaust ríki og láta Kofi Annan, framkvæmdastjóra SÞ, hafa umsjón með keppninni. Báðir myndu nota samskonar vopn, forseti gegn forseta, varaforseti gegn varaforseta. Þá gæti einvígið hafist," sagði Ramadan.