Bein af sjávarskriðdýri finnast við Loch Ness

Skoskur ellilífeyrisþegi hefur fundið steingerð bein 150 milljón ára gamals sjávarskriðdýrs við Loch Ness-vatn í Skotlandi.

Beinin eru af svonefndum plesiosaurus, en það er samheiti yfir nokkrar skriðdýrategundir sem dóu út fyrir um 65 milljónum ára. Talið er að dýrin hafi helst líkst eins konar blöndu af risasnáki og skjaldböku, og stærstu tegundirnar urðu allt að 20 metra langar.

Skoski ellilífeyrisþeginn Gerald McSorley, sem er fyrrum bílavarahlutasali, segist alltaf hafa trúað á Loch Ness-skrímslið, en eftir beinafundinn hafi hann sannfærst. Hann bendir á að lýsingar sjónvarvotta á Loch Ness-skrímslinu geti vel átt við um pleisiosaurus.

Forseti aðdáendaklúbbs Loch Ness-skrímslisins segir að ekki megi draga of miklar ályktanir af beinafundinum. Hann bendir á að það hafi gerst áður að sambærilegum hlutum hafi verið komið fyrir í grennd við vatnið í þeirri von að einhver rækist á þá.

Til er sérstakur vefur helgaður pleisiosaurus. Á honum eru færð ýmis rök fyrir því að Loch Ness-skrímslið geti ekki verið pleisiosaurus, enda er þetta ekki í fyrsta sinn sem ættir skrímslisins eru raktar 65 milljónir ára aftur í tímann.

• Blogga um frétt