Vísindamenn frá Venesúela hafa þróað aðferð til að rækta næringarríkar baunir sem ekki valda neinum vindgangi. Baunir eru ódýr matur og þess vegna mikilvægar, einkum í þróunarlöndum, en talið er að margir forðist þær vegna þeirra „félagslegu aukaverkana“ sem þær hafa.
Vísindamennirnir, sem starfa við Simon Bolivar-háskóla í Caracas, segja að með því að láta baunirnar gerjast í ákveðnum bakteríugróðri megi minnka vindmyndandi efni í þeim og auka næringargildi þeirra. Rannsóknir þeirra eru birtar í tímaritinu Journal og the Science of Food and Agriculture.
Vindgangur myndast af völdum baktería sem búa í þörmunum og brjóta niður efni í mat, eins og til dæmis trefjar, sem ekki hafa verið meltar ofar í meltingarveginum. Baunir, eins og til dæmis svartar baunir, sem eru mikið borðaðar í Mið- og Suður-Ameríku, innihalda mikið af slíkum efnum.