„Það var mjög mikilvægt að ná þessum sigri. Við viljum klára þetta almennilega fyrir jól,“ sagði Þorsteinn Gauti Hjálmarsson, sem líkt og fleiri Framarar átti mjög góðan leik í sigrinum á Val í kvöld, 30:23, í Olís-deild karla í handbolta.

Fram hafði tapað fimm síðustu leikjum sínum í deildinni en var með frumkvæðið nær allan leikinn í kvöld og vann sannfærandi sigur.

Frétt mbl.is: Fram rauf taphrinuna með stæl

„Við höfum ekki verið að mæta almennilega til leiks í þessum leikjum, nema núna síðast gegn Haukum. Þá fengum við aftur baráttu í liðið og reyndum að byggja ofan á það í dag, eins og sást. Það var alvörubarátta í liðinu og þá getum við náð góðum úrslitum,“ sagði Þorsteinn Gauti, ánægður með hve margir lögðu hönd á plóg í sigrinum:

Guðjón Andri 100% og Daníel sjóðheitur

„Menn voru að koma frábærir inn af bekknum eins og Guðjón Andri [Jónsson] sem átti 100% leik, fiskaði tvisvar sinnum ruðning og nýtti öll sín færi, og Danni [Daníel Þór Guðmundsson] í markinu sem var búinn að vera sjóðheitur á æfingum og lokaði rammanum. Lúðvík [Thorberg Arnkelsson], sem hefur kannski ekki farið mikið fyrir, átti líka geggjaðan leik. Hann er bara ´97-módel en hefur verið að koma hægt og rólega inn í þetta hjá okkur í síðustu leikjum og í kvöld sýndi hann virkilega hvað hann getur.  Það voru allir að skila sínu,“ sagði Þorsteinn Gauti.

Arnar Birkir Hálfdánsson var markahæstur hjá Fram með 8 mörk, en hann var tekinn úr umferð fljótlega í seinni hálfleik. Þá tóku Þorsteinn Gauti og Lúðvík við keflinu, ásamt fleirum.

„Þetta var bara veisla fyrir okkur. Þetta er eiginlega alltaf svona, þegar við erum að vinna í leikjum, að andstæðingarnir taka Arnar Birki úr umferð. Það var flott að ná að klára dæmið þrátt fyrir það. Við sýndum að þegar við mætum í leiki með 100% baráttu þá getum við verið helvíti góðir,“ sagði Þorsteinn Gauti.