Leeds United styrkti stöðu sína í baráttu sinni um sæti í umspili um laust sæti í ensku úrvalsdeildinni í knattspyrnu karla með mikilvægum 1:0-sigri sínum gegn Sheffield Wednesday í ensku B-deildinni í hádeginu í dag.
Það var Chris Wood sem tryggði Leeds United sigurinn með marki sínu á 24. mínútu leiksins. Leeds United er í fjórða sæti deildarinnar með 61 stig eftir þennan sigur.
Sheffield Wednesday er aftur á móti í sjötta sæti deildarinnar með 58 stig, en sjötta sætið er síðasta sætið sem veitir þátttökurétt í umspili um eitt laust sæti í ensku úrvalsdeildinni á næstu leiktíð.
Ragnar Sigurðsson og félagar hans hjá Fulham eru síðan í sjöunda sæti deildarinnar með 52 stig og eru því sex stigum frá sæti í umspilinu um laust sæti í ensku úrvalsdeildinni á næsta keppnistímabili.
Fulham á tvo leiki til góða á Sheffield Wednesday, en Fulham mætir Aroni Einari Gunnarssyni og félögum hans hjá Cardiff City sem er í 12. sæti deildarinnar með 45 stig klukkan 15.00 í dag.