„Fyrst og fremst eru þessi úrslit svekkjandi,“ sagði Einar Andri Einarsson, þjálfari Aftureldingar, eftir að lið hans tapaði, 26:22, fyrir Val í úrslitum Coca Cola-bikarsins í handknattleik karla í Laugardalshöll í kvöld. Leikurinn var jafn lengst af en Valsmenn voru sterkari á síðustu mínútunum og tryggðu sér bikarinn annað árið í röð.

„Þetta var jafn leikur. Við vorum aðeins yfir í síðari hálfleik en þeir komust yfir í þeim síðari. Litlu atriðin réðu úrslitum þegar upp var staðið. Hver mistök eru dýr í svona leikjum,“ sagði Einar Andri.

„Það er hugsanlega skýring að leikurinn við Hauka í undanúrslitum hafi setið í okkur þegar kom fram í lokin á leiknum. Valsmenn léku einnig erfiðan leik í gær,“ sagði Einar Andri spurður hvort framlengdur undanúrslitaleikur við Hauka í gærkvöldi hafi setið í leikmönnum hans þegar kom fram á síðustu mínútur úrslitaleiksins við Val í dag.

„Markið sem Josip skoraði og kom Val yfir, 21:20, í þann mund sem var að koma töf á þá var afar mikilvægt fyrir þá. Valsmenn eru mjög klókir í sínum sóknarleik og fá að komast upp með að hanga mikið á boltanum,“ sagði Einar Andri enn fremur en hann hefur tekið við silfurverðlaunum tvö síðustu ár á Íslandsmótinu og fékk einnig silfur að þessu sinni í bikarkeppninni.

„Það er gaman að vera í þeirri stöðu skipti eftir skipti að vera í keppni um titlana en silfrið er orðið ansi hreint súrt,“ sagði Einar Andri Einarsson, þjálfari Aftureldingar í samtali við mbl.is.