Karlalið ÍBV í knattspyrnu fékk liðsstyrk í dag þegar enski miðvörðurinn David Atkinson gekk í raðir félagsins.
Atkinson er 24 ára gamall, uppalinn hjá enska liðinu Middlesbrough en náði ekki að spila leiki með aðalliði félagsins. Hann fór til Carlisle og lék á fjórða tug leikja með því í ensku D-deildinni en síðast var hann á mála hjá utandeildarliðinu Blyth Spartans.
Atkinson er ætlað að fylla skarð Avni Pepa sem er farinn frá ÍBV og er genginn til liðs við norska B-deildar liðið Arendal.