Enska úrvalsdeildarfélagið WBA hyggst ræða við Alan Pardew með það fyrir augum að fá hann í starf sem knattspyrnustjóra félagsins.

WBA er í stjóraleit eftir að Tony Pulis var rekinn úr starfi í gær og forráðamenn félagsins eru sagðir hafa mikinn áhuga á að fá Pardew í starfið. Hann er á lausu eftir að hafa fengið reisupassann hjá Crystal Palace í desember á síðasta ári en áður hafði Pardew stýrt m.a. Newcastle og West Ham.

Illa hefur gengið hjá WBA síðustu vikurnar en liðið er í fjórða neðsta sæti ensku úrvalsdeildarinnar með 10 stig eftir tólf leiki.