Ef til neyðarrýmingar kemur vegna eldgoss í Öræfajökli skulu þeir sem búa í námunda við jökulinn fara stystu leið að bæjunum Svínafelli 1, Hofi 1 eða Hnappavöllum 2. Þar skulu þeir bíða frekari fyrirmæla í bílum sínum. Ef til öskufalls kemur skuli fólk leita skjóls innandyra eða halda kyrru fyrir í bílum. Þegar fyrirmæli verða gefin skal fylgja þeim og yfirgefa svæðið.

Þetta er á meðal þess sem fram kemur í neyðarrýmingaráætlun sem almannavarnir hafa gefið út vegna jarðhræringa í Öræfajökli. Þar er farið yfir hlutverk allra viðbragðsaðila ef til eldgoss kemur. Sem dæmi má nefna að 112 er falið að senda SMS-skilaboð á alla sem búa frá Lómagnúpi að Jökulsárlóni sem innihalda fyrirskipun um tafarlausa rýmingu.

Fram kemur að ef eldgos verður í Öræfajökli skuli stefnt að því að rýma svæðið áður. Ef eldgos hefst án fyrirvara skal neyðarrýmingaráætlunin taka gildi.

Hér fyrir neðan má sjá til hvaða bragðs 112, lögreglan á Suðurlandi, björgunarsveitir og aðrir viðbragðsaðilar skulu taka, ef fyrirvaralaust gýs í jöklinum.

Almannavarnadeild:

• Felur 112 að senda fjölda SMS-skilaboða á senda frá Lómagnúpi að Jökulsárlóni
  • Frá lögreglu. Eldgos er yfirvofandi í Öræfajökli. Rýmið á Svínafell 1, Hof 1 eða Hnappavelli 2, Höfn eða Kirkjubæjarklaustur eftir því hvar þið eruð. Tafarlaus rýming. Neyðarástand
  • Emergency message from the Police. Volcanic eruption is imminent in Öræfajökull. Evacuate to Svínafell 1, Hof 1 or Hnappavellir 1, Höfn or Kirkubæjarklaustur depending on your location.
• Virkjar SST

Lögreglan á Suðurlandi

• Sendir lögreglubíla frá Kirkjubæjarklaustri að Skaftafelli til að aðstoða við rýmingu
• Sendir Lögreglubíla frá Höfn að Kvískerjum til að aðstoða við rýmingu
• Sendir allt tiltækt lið til aðstoðar

Björgunarsveitir

• Kyndill á Kirkjubæjarklaustri lokar við Lómagnúp og aðstoðar við rýmingu
• Björgunarfélag Hornafjarðar lokar við Jökulsárlón og aðstoðar við rýmingu
• Björgunarsveitin Kári hefur ekki hlutverk við neyðarrýmingu

Sjúkraflutningar

• Sjúkrabíll á Kirkjubæjarklaustri fer í viðbragðsstöðu við Hótel Núpa
• Sjúkrabíll á Höfn fer í viðbragðsstöðu hjá Hrollaugsstöðum í Suðursveit

Rauði krossinn - Fjöldahjálparstöðvar

• Deildin á Kirkjubæjarklaustri undirbýr móttöku fólks í fjöldahjálparstöð
• Deildin á Höfn undirbýr móttöku fólks í fjöldahjálparstöð
• Ákvörðun tekin um opnun fjöldahjálparstöðvar nær rýmingarsvæðinu ef þörf krefur

Slökkvilið

• Eru í viðbragðsstöðu til aðstoðar við móttöku fólks
• Aðstoða lögreglu við rýmingu ef þörf krefur

Vettvangsstjórnir

• Vettvangsstjórn verður á Kirkjubæjarklaustri
• Vettvangsstjórn verður á Höfn
• Vettvangsstjórn verður í Öræfum, staðsetning eftir aðstæðum 

Aðgerðastjórn

• Dynskálar 34, Hellu

Samhæfingarstöð

• Björgunarmiðstöðinni í Skógarhlíð, Skógarhlíð 14, Reykjavík

Leiðbeiningar til þeirra sem eru á rýmingarsvæðinu í tilfelli neyðarrýmingar:

• Farið stystu leið að
  • Svínafelli 1
  • Hofi 1
  • Hnappavöllum 2
• Bíðið frekari fyrirmæla þar í bílum
• Ef til öskufalls kemur, leitið skjóls innandyra eða haldið kyrru fyrir í bílum
• Þegar fyrirmæli verða gefin skal fylgja þeim og yfirgefa svæðið