Margrét Mist Tindsdóttir, oftast kölluð Mæja, er mikill tískuunnandi með gott auga fyrir fallegri hönnun. Hún hefur haft áhuga á tísku frá því hún man eftir sér og var strax komin með sterkar skoðanir á fatavali þegar hún var á leikskólaaldri. 

Að undanförnu hefur tískuáhugi Mæju fengið að blómstra enn frekar, en hún er með BA gráðu í Business & Design frá KEA-háskólanum í Kaupmannahöfn og starfar sem markaðsstjóri hjá fataversluninni Húrra Reykjavík og hjá sprotafyrirtækinu Regn sem er nýtt símaforrit býður notendum að kaupa og selja notaðan fatnað. 

Hefur þú alltaf haft áhuga á tísku?

„Já ætli það ekki, pabbi gafst að minnsta kosti ansi fljótt upp á því að koma með tillögur af fatnaði fyrir leikskólann þar sem ég hafði yfirleitt sterkar skoðanir og þeim var ekki haggað. Ég man líka að ein skemmtilegasta jólagjöfin frá mínum yngri árum var þegar ég fékk Hagkaupspoka fullan af afgangs efnum sem ég dundaði mér við að sauma saman og búa til fatalínu.“

Hvernig myndir þú lýsa fatastílnum þínum?

„Ég myndi lýsa honum sem kvenlegum í bland við „sporty“.“

Hvernig klæðir þú þig dagsdaglega? En þegar þú ferð eitthvað fínt?

„Ég er á móti því að eiga spariföt og finnst synd að loka fallegar flíkur inni í skáp og bíða eftir fínna tilefni svo ég nota kjóla, pils og glimmer óháð því hvort það sé mánudagur eða laugardagskvöld.

Eini munurinn er að ég klæði flíkina þá frekar niður – fer t.d. í háskólapeysu við útvítt pils og strigaskó. Dagsdaglega er ég praktískari í skóvali þar sem ég labba alltaf í vinnu en stefni á að endurvekja Köbenlífstílinn og fá mér hjól en þá verður ekkert því til fyrirstöðu að skella mér í hæla.“

Fyrir hverju fellur þú oftast?

„Ljósum litum, glimmeri og settum.“

Bestu fatakaupin?

„Þessa dagana fer ég ekki úr hvítum pels sem ég fékk í jólagjöf en hann var einmitt keyptur notaður á Regn appinu. Svo glæsilegur og passar við allt.“

Verstu fatakaupin?

„Óþægilegir skór og föt úr lélegum efnum sem verða þar af leiðandi eins og lufsur eftir fyrstu notkun.“

Áttu þér uppáhaldsfylgihlut?

„Sá fylgihlutur sem ég hef notað hvað mest er hvít Bottega Veneta taska sem ég keypti mér þegar ég vann þar. Hún er svo vönduð og hægt að breyta henni í „clutch“ með því að smella böndunum af eða smella þeim saman og þar með lengja í ólinni.“

Hvað er efst á óskalistanum þínum um þessar mundir?

„Hingað til hef ég verið að fá lánaða Maison Margiela hæla hjá systur minni en þeir eru svo fallegir og þægilegir að ég væri alveg til í að eignast mitt eigið par.“

Áttu þér uppáhaldsmerki?

„Mér finnst allt fallegt frá Chanel og elska að fylgjast með tískusýningunum þeirra.“

Hvar verslar þú oftast?

„Ef ég lít yfir síðustu ár, þá hef ég mest verslað „elskuð föt“ eða „second hand“. Hér heima versla ég mest á Regn appinu og þegar ég fæ mér eitthvað nýtt þá er það úr Húrra. Þegar ég fer erlendis elska ég að skoða í þessum fínni verslunum með notuð föt en í síðustu ferð keypti ég mér t.d. þessa æðislegu ullardragt.“

Sjálfbær fatakaup á Íslandi tekin skrefinu lengra

Að undanförnu hefur Mæja verið að vinna að nýju símaforriti, Regn, þar sem notendur geta bæði keypt og selt notaðan fatnað. „Þegar ég bjó úti notaði ég fatasöluöpp endalaust – bæði til að kaupa og selja notuð föt. Þegar ég komst að því að sambærilegt íslenskt app væri í bígerð varð ég að fá að vera með fingurna í því en síðasta ágúst fór Regn á App Store. Sjálf er ég gríðarlega stolt af appinu sem hefur nú tekið sjálfbær fatakaup á Íslandi skrefinu lengra,“ segir hún. 

Aðspurð segir Mæja nafnið vera beina tilvísun í náttúruna og hringrás hennar. „Við erum mjög ánægð með nafnið sem er bein tilvísun í náttúruna og hringrásina; vatn gufar upp og verður að skýi sem svo rignir niður. Regn appið byggir á sömu hringrásarhugmynd, nema þar eru það elskaðar flíkur sem mynda hringrásina,“ útskýrir hún. 

Hvert sækir þú innblástur þegar þú setur saman dress?

„Mér finnst oft gaman að blanda saman andstæðum – strigaskóm og kjól eða hversdagslegum gallabuxum við fína skyrtu. Mér finnst líka oft koma vel út að blanda saman mismunandi efnum í sama lit. Annars fæ ég oftast hugmyndir frá mömmu, systrum mínum og frænkum – og svo auðvitað Instagram.“

Hver finnst þér vera best klæddi einstaklingurinn í heiminum í dag?

„Ég elska að fylgjast með Josefine Haaning, Emili Sindlev og Sofia Richie.“