Að minnsta kosti þrír eru látnir í kjölfar jarðskjálftans á Ítalíu í morgun. Skjálftinn mældist 5,8 stig og varð um kl. 7 í morgun að íslenskum tíma.

Jarðskjálfti sem mældist 5,8 stig varð á Norðaustur-Ítalíu í morgun. Mjög snarpur skjálfti varð á þessu sama svæði fyrir níu dögum og þá létust sex manns og mörg hús eyðilögðust.

Áströlsk yfirvöld ráku í dag úr landi tvo sýrlenska stjórnarerindreka sem andsvar við fjöldamorðunum í bænum Houla. Yfir 100 manns týndu lífi í árás á bæinn. Utanríkisráðherra Ástralíu vonast til þess að önnur lönd fylgi fordæmi Ástrala.

Tveir danskir bræður af sómölskum uppruna hafa verið handteknir í Danmörku vegna gruns um að hafa verið að skipuleggja hryðjuverkaárás, að sögn dönsku öryggislögreglunnar PET.

Leiðtogi stjórnarandstöðunnar í Búrma, Aung San Suu Kyi, heldur til Bangkok í dag en þetta er í fyrsta sinn síðan árið 1988 sem hún fer út fyrir landsteinana.

Fjögur börn frá Spáni, þríburar frá Nýja-Sjálandi og franskt barn voru á meðal þeirra sem létust í eldsvoða í verslunarmiðstöð í Doha, höfuðborg Katar, í gær.

Talið er að tékknesk kona, sem fannst látin á sunnudag í afskekktum skógi í Nýja-Sjálandi, hafi fallið fyrir hendi kynferðisglæpamanns sem fannst látinn við hlið hennar.

Mótmælendur í Kaíró kveiktu í kosningamiðstöð Ahmed Shafiq, fyrrverandi forsætisráðherra, en tilkynnt var í dag að hann hefði komist í aðra umferð í forsetakosningunum í Egyptalandi.

Bandarískir og s-kóreskir sérsveitarmenn hafa verið sendir inn fyrir landamæri N-Kóreu til að afla upplýsinga. Þeir létu sig falla til jarðar með fallhlífum. Þetta sagði bandarískur herforingi á ráðstefnu í Flórída í síðustu viku.

Kofi Annan, fyrrverandi framkvæmdastjóri Sameinuðu þjóðanna, kom í dag til Sýrlands til að reyna að koma á vopnahléi. Við komuna sagðist hann orðið fyrir áfalli yfir þeim hryllilegu morðum sem áttu sér stað í borginni Houla.

Yfirvöld í Síle hafa gefið fyrirskipun um að 500 þúsund svínum á risastóru svínabúi við bæinn Freirina í Síle verði slátrað. Búið verður lagt niður. Íbúar Freirina hafa barist gegn búinu, m.a. vegna lyktarinnar frá því.

A.m.k. 19 létust þegar eldur kviknaði í verslunarmiðstöð í Doha, höfuðborg Katar. 13 börn eru sögð hafa látist í brunanum.

Tæplega 100 byggingar hafa brunnið í Michigan í Bandaríkjunum, en miklir skógareldar hafa brunnið í fylkinu síðustu daga. Engin slys hafa orðið á fólki.

18 ára Finni, Eero Hiltunen, sem skaut á hóp fólks í bænum Hyvinkää á laugardaginn með þeim afleiðingum að tveir samnemendur hans létust og sjö aðrir slösuðust, hefur verið úrskurðaður í gæsluvarðhald. Einnar mínútu þögn var haldin í bænum í morgun og mátti víða sjá flaggað í hálfa stöng.

Nokkur hundruð konur ætla á morgun að koma saman í Tyrklandi og mótmæla ummælum forsætisráðherrans Tayyip Erdogan. Hann líkti fóstureyðingum við morð og hafa baráttumenn fyrir réttindum kvenna í landinu kallað hann „óvin kvenna“.

Mótmælandi komst inn í sal þar sem yfirheyrslur yfir Tony Blair fóru fram fyrir rannsóknanefnd um spillingu í bresku þjóðlífi og ásakaði forsætisráðherrann fyrrverandi um stríðsglæpi.

Mohammed Mursi, frambjóðandi Bræðralags múslima í Egyptalandi og Ahmed Shafiq, fyrrverandi forsætisráðherra, fengu flest atkvæði í fyrri umferð forsetakosninganna í Egyptalandi. Kosið verður milli þeirra í næsta mánuði.

Lögreglan í Miami í Bandaríkjunum skaut til bana nakinn mann sem var að reyna að rífa af andlit annars manns með tönnunum og borða það. Þá reyndi hann að stinga úr honum augun. Atvikið átti sér stað á fjölfarinni umferðargötu.

Tony Blair hafnar því að hafa í forsætisráðherratíð sinni samið við fjölmiðlamógúlinn Rubert Murdoch um það hvernig fjölmiðlar á hans vegum fjölluðu um ríkisstjórnina. Hann viðurkennir þó að hafa verið heldur náinn fjölmiðlasamsteypunni News International.

Fimm lögreglumenn voru í dag dæmdir í fimm til sjö ára fangelsi í Kazakstan fyrir þeirra þátt í óeirðum í desember sem kostuðu 15 manns lífið.