Fjórtándu umferð 1. deildar karla lauk í kvöld með fjórum leikjum. Leiknismenn sigruðu KV 2:1, Skagamenn höfðu betur gegn Víkingi Ó. 3:1, Selfoss vann Þrótt 2:1 í Laugardal og Haukar fóru létt með Tindastól 5:0.
Leiknismenn hafa 33 stig og halda toppsæti deildarinnar. Þeir hafa sex stiga forskot á Skagamenn í 2. sæti sem nú sitja þar einir þar sem Þróttur tapaði gegn Selfossi í Laugardalnum.
Ólsarar fjarlægjast hins vegar Pepsi-deildarsætið með tapinu í kvöld. Þeir eru nú í 5. sæti, fimm stigum á eftir ÍA. KV-menn fóru niður um tvö sæti eftir tapið gegn Leikni þar sem bæði Selfoss og Haukar unnu sína leiki í kvöld. KV er í 9. sæti deildarinnar með 17 stig, stigi á eftir Selfossi í 8. sætinu.
Leiknismenn komu sigrinum í hús
Reykjavíkurslagur af bestu gerð fór fram í Breiðholti þegar Leiknismenn tóku á móti Vesturbæingum úr KV en lokatölur urðu 2:1 fyrir Breiðhyltingum í spennandi leik.
Leiknismenn byrjuðu leikinn mun betur og komust yfir með marki frá fyrirliða liðsins, Óttari Bjarna Guðmundssyni eftir 7. mínútna leik.
Vesturbæingar gáfust ekki upp og jöfnuðu leikinn í síðari hálfleik en markið skoraði Garðar Ingi Leifsson, beint úr aukaspyrnu á 66. mínútu. Leiknismenn voru fljótir að svara og skoruðu sigurmarkið einungis fjórum mínútum síðar og tryggðu sér dýrmæt stig í toppbaráttunni.
ÍA sigraði í Vesturlandsslagnum
Í Ólafsvík tóku heimamenn í Víkingi Ó. á móti Skagamönnum í sannkölluðum Vesturlandsslag og urðu lokatölur 3:1 fyrir ÍA í hörkuleik en bæði lið eiga raunhæfa möguleika á að komast upp um deild.
Fyrsta mark leiksins skoraði Skagamaðurinn Garðar Gunnlaugsson á 16. mínútu. Þá tók við löng bið eftir næsta marki en flóðgáttir opnuðu hins vegar á síðustu 10 mínútum leiksins.
Markahrókurinn Hjörtur Hjartarson kom Skagamönnum í 2:0 á 84. mínútu með sínu fyrsta marki í sumar. Garðar Gunnlaugsson skoraði þriðja mark ÍA, og sitt annað mark í leiknum einungis fjórum mínútum síðar. Garðar hefur nú skorað 14 mörk í deildinni og er markahæstur.
Þorsteinn Már Ragnarsson, sem kom nýverið frá KR á láni lagaði stöðuna fyrir Ólafsvíkinga í lokin úr vítaspyrnu og þar við sat.
Frábær útisigur Selfoss
Í Laugardal vann Selfoss frábæran útisigur á Þrótti R. en lokatölur urðu 2:1 fyrir Selfyssingum.
Björgólfur Takefusa var í byrjunarliði Þróttara eftir að hafa komið að láni frá Fram en það voru hins vegar Selfyssingar sem skoruðu fyrsta mark leiksins en þar var að verki Luka Jagacic á 20. mínútu.
Aron Green jafnaði sex mínútum síðar fyrir Þróttara eftir laglegan samleik við Rafn Andra Haraldsson. Gestirnir frá Selfossi voru hins vegar öflugir í leiknum og uppskáru sigurmark á 63. mínútu. Aftur var þar á ferðinni Luka Jagacic fyrir Selfoss, með skalla eftir hornspyrnu á 63. mínútu leiksins.
Tindastóll engin fyrirstaða
Á Sauðárkróki fóru Haukar létt með botnlið Tindastóls 5:0 en mörk Hauka skoruðu þeir Zlatcko Krickic, Hilmar Geir Eiðsson, Brynjar Benediktsson og Andri Gíslason sem skoraði tvö síðustu mörk Hafnarfjarðarliðsins.