Igor Taskovic, fyrirliði Víkings Reykjavíkur, stóð vaktina í 1:2 sigurleik gegn Þrótturum í dag. Hann segist óviss hvort hann haldi áfram hjá Víkingum á næstu leiktíð.
„Ég fer núna til Þýskalands en fjölskyldan mín býr þar. Ég verð þar næstu mánuðina og eftir það sé ég til. Ég er í mjög erfiðri stöðu. Konan mín býr ein í Þýskalandi með dóttur okkar sem er í skóla þar,“ sagði Taskovic að leik loknum.
„Ég er ekki að segja að ég sé hættur hjá Víkingum en það getur gerst.“
Spurður út í sumarið með Víkingum sagðist hann ánægður með ýmislegt. „Við fengum 32 stig, ég spilaði alla leikina og þarna eru ungir, góðir leikmenn. Öll fjögur árin hjá mér hafa verið jafnskemmtileg.“