Knattspyrnumaðurinn Gísli Eyjólfsson hefur skrifað undir nýjan þriggja ára samning við Breiðablik, en þetta kemur fram á blikar.is í dag.
Gísli er 22 ára miðjumaður, sem hefur leikið 46 leiki fyrir Breiðablik og skorað í þeim sex mörk en þar af eru 23 leikir og 2 mörk í úrvalsdeildinni.
Gísli spilaði með Augnabliki árið 2013 en auk þess hefur hann leikið sem lánsmaður fyrir bæði Hauka og Víking Ólafsvík. Hann vann sér inn sæti í liði Breiðabliks síðasta sumar, eftir lánsdvöl í Ólafsvík fyrri hluta tímabilsins, og stóð sig með miklum ágætum.