Stephen Bradley, knattspyrnustjóri írska félagsins Shamrock Rovers, gerði sér ferð til Íslands um helgina til að sjá Stjörnuna spila við ÍA í Pepsi-deild karla í knattspyrnu. Rovers og Stjarnan mætast í forkeppni Evrópudeildarinnar á fimmtudag.
„Ef að við spilum samkvæmt okkar getu þá eigum við góða möguleika,“ sagði Bradley við The Herald.
„Stjarnan er gott lið, mjög sterkt í föstum leikatriðum, og þetta ætti að verða jafnt því liðið er í svipuðum gæðaflokki og við. En ef við spilum af okkar getu þá getum við unnið einvígið í tveimur leikjum,“ sagði Bradley.
Stjarnan og ÍA gerðu 2:2-jafntefli í leiknum á laugardag og aðeins 680 manns mættu á völlinn.
„Það var gott að sjá nákvæmlega hvernig þetta verður. Þetta er lítill leikvangur og bara ein stúka. Ég get komið öllum upplýsingum núna til leikmannanna,“ sagði Bradley.