Valskonur tryggðu sér í kvöld Reykjavíkurmeistaratitilinn í fótbolta með 3:1-sigri á KR í Egilshöllinni. Staðan í hálfleik var 1:1, en Valur var sterkari aðilinn í seinni hálfleik og tryggði sér sigurinn.
Landsliðskonan Hallbera Guðný Gísladóttir kom Val yfir með laglegu marki á 36. mínútu en Mónika Hlíf Sigurhjartardóttir jafnaði á 42. mínútu og voru það einu mörk fyrri hálfleiksins.
Hallgerður Kristjánsdóttir og Ragna Guðrún Guðmundsdóttir bættu við mörkum fyrir Val í síðari hálfleik og tryggðu Reykjavíkurtitilinn.
Valur hefur þar með unnið mótið þrjú ár í röð og tíu sinnum á undanförnum ellefu árum.