Serbneski knattspyrnumaðurinn Milan Joksimovic, sem kom til KA-manna í síðasta mánuði, meiddist illa á hné í sigurleik KA gegn Breiðabliki í Lengjubikarnum fyrir rúmri viku. Hnéskelin færðist þá meðal annars úr stað, en hann fékk þó góðar fréttir í dag.
Í fyrstu var talið að um afar alvarleg meiðsli væru að ræða, en krossbandið var þó heilt en óvissa ríkti um liðböndin. Srdjan Tufegdzic, þjálfari KA, sagði við fotbolti.net í dag að liðböndin væru í lagi en það tæki um 4-6 vikur fyrir hnéskelina að gróa almennilega. Joksimovic ætti að vera klár í slaginn snemma í maí, en Pepsi-deildin hefst þann 28. apríl.
Joksimovic er 27 ára gamall vinstri bakvörður sem kom til KA-manna frá liði frá Gorodeya í Hvíta-Rússlandi. Joksimovic kom til Gorodeya og lék seinni hluta tímabilsins í úrvalsdeildinni í Hvíta-Rússlandi 2017 þar sem hann spilaði 12 leiki. Áður lék hann í fjögur ár í næstefstu deild í Serbíu en hafði áður spilað í úrvalsdeildinni þar í þrjú ár með Indija og Spartak Subotica.