Jón Þór Hauksson var nú rétt í þessu kynntur sem nýr þjálfari kvennalandsliðs Íslands í knattspyrnu, en þetta var opinberað á fréttamannafundi í höfuðstöðvum KSÍ. Ian Jeffs verður aðstoðarlandsliðsþjálfari.
Samningur Jóns Þórs við KSÍ er til tveggja ára, en hann tekur við starfinu af Frey Alexanderssyni sem hætti með liðið í síðasta mánuði og gerðist aðstoðarþjálfari karlalandsliðsins.
Jón Þór er fæddur árið 1978 og var síðast aðstoðarþjálfari karlaliðs Stjörnunnar síðastliðið sumar. Hann var áður aðstoðarþjálfari ÍA, en tók við sem aðalþjálfari í síðustu sex leikjum liðsins í Pepsi-deildinni 2017 er það féll úr efstu deild. Það eru einu leikir hans sem aðalþjálfari.
Á ferli sínum sem leikmaður spilaði hann með Skallagrími í 1. deildinni sumarið 1998 og svo tvo leiki í úrvalsdeild með ÍA sumarið 1999. Eftir það spilaði hann örfáa leiki með ÍA, Kára og Aftureldingu á leikmannaferlinum. Hann spilaði átta leiki með U17 ára landsliði Íslands árið 1993.
Ian Jeffs hætti með kvennalið ÍBV í haust eftir fjögurra ára starf. Hann kom fyrst hingað til lands árið 2003 og lék með ÍBV frá árunum 2003 til 2016, með nokkrum hléum.