Færeyski landsliðsmaðurinn René Joensen staðfesti eftir leik Færeyja og Möltu í D-deild Þjóðadeildar UEFA í knattspyrnu í gærkvöld að hann muni leiki áfram með Grindvíkingum.
Þetta kemur fram á færeyska netmiðlinum in.fo en í sama miðli var haft eftir honum í síðasta mánuði að hann vildi reyna fyrir sér hjá stærra félagi.
Joensen skoraði mark Færeyinga í 1:1 jafntefli gegn Möltu og hann varð markahæsti leikmaður Færeyinga í Þjóðadeildinni þar sem hann skoraði 3 af 10 mörkum þeirra.
Joensen spilaði 22 leiki í deild og bikar með Grindvíkingum í sumar þar sem hann skoraði þrjú mörk. Hann kom til félagsins sumarið 2017 frá Vendsyssel í Danmörku.