Landsliðskonurnar Rakel Hönnudóttir og Anna Björk Kristjánsdóttir verða ekki áfram í herbúðum Limhamn Bunkeflo í sænsku úrvalsdeildinni í knattspyrnu á næstu leiktíð. Þetta staðfestu þær við Morgunblaðið í gær.
Rakel og Anna Björk áttu stóran þátt í því að LB tækist að halda sér á lífi í úrvalsdeildinni, með ótrúlegum hætti, en liðið vann fjóra af síðustu fimm leikjum sínum og endaði tveimur stigum frá fallsæti.
Rakel skoraði í fimm af síðustu sex leikjum tímabilsins og endaði markahæst með 8 mörk, en Anna Björk stóð vaktina í vörninni sem hélt markinu hreinu í þremur af síðustu fimm leikjunum.
Báðar stefna landsliðskonurnar að því að vera áfram í atvinnumennsku en ekki er víst að það verði í Svíþjóð. Rakel lék eina leiktíð með LB, sem er í Malmö, eftir að hafa áður verið hjá Breiðabliki og Þór/KA. Anna Björk lék tvær leiktíðir með LB eftir að hafa verið hjá Örebro í eitt ár, en hún var áður hjá Stjörnunni. sindris@mbl.is