Jónas Kristinsson, framkvæmdastjóri KR, segir það hafa komið sér svolítið á óvart að ekki skuli vera leikið í Pepsí Max-deildunum þótt annað í knattspyrnunni kynni að vera áfram á ís.
Þar séu hagsmunirnir mestir og hjá karlaliði KR sé til að mynda leikur fram undan í 1. umferð Meistaradeildar Evrópu. Einnig þurfi Íslandsmótið að skera úr um hvaða lið leika í Evrópukeppnum á næsta ári. Þess vegna séu hagsmunirnir talsverðir varðandi úrvalsdeildirnar.
Jónas sagði frá þessu í þættinum Mín skoðun með Valtý Birni á SportFM í gær eftir að tilkynnt var um frekari frestanir í knattspyrnunni vegna tilmæla yfirvalda.
„Við verðum að hlýða fyrirmælum eins og aðrir landsmenn,“ bætti Jónas við.
Í máli Jónasar kom jafnframt fram að launakostnaður knattspyrnudeilda á Íslandi gæti samanlagt farið yfir milljarð króna og því sé töluvert skattfé sem komi til vegna knattspyrnunnar. Í þættinum var einnig rætt við Viðar Halldórsson, formann aðalstjórnar FH, sem benti á að velta FH hefði verið á bilinu 700-800 milljónir á síðasta ári.
Þá var einnig rætt við Eystein Pétur Lárusson, framkvæmdastjóra knattspyrnudeildar Breiðabliks, í þættinum.