„Við áttum sigurinn skilið í dag. Við spiluðum vel frá fyrstu mínútu og það skipti öllu máli,“ sagði Per Mertesacker, varnarjaxl Arsenal, eftir að liðið tryggði sér sinn tólfta bikarmeistaratitil eftir sigur á Aston Villa í úrslitaleik í dag, 4:0. Hann skoraði þriðja markið með hörku skalla.
„Í fyrra lentum við illa í því í fyrri hálfleik en í dag skoruðum við með reglulegu millibili sem skipti sköpum. Það er gott að enda tímabilið svona og ég get nú horft spenntur til þess að komast í sumarfrí í fyrsta sinn eftir að ég hætti að spila með landsliðinu,“ sagði Mertesacker, og vitnaði til úrslitaleiksins í fyrra þar sem Arsenal stóð einnig uppi sem sigurvegari eftir að hafa lent 2:0 undir gegn Hull.
„Vonandi byrjum við næsta tímabil af svipuðum krafti og við klárum þetta, en fyrst ætlum við að fagna þessum titli.“