Knattspyrnustjóri Tottenham, Mauricio Pochettino, vill byggja upp svipað veldi hjá Tottenham og Sir Alex Ferguson gerði hjá Manchester United.
Pochettino samþykkti í dag að framlengja samning sinn við Tottenham um tvö ár sem þýðir að nýr samningur rennur út árið 2021. Undir stjórn Argentínumannsins hefur Tottenham verið í harðri baráttu um Englandsmeistaratitilinn í vetur en er nú reyndar komið sjö stigum á eftir toppliði Leicester þegar þrjár umferðir eru eftir.
„Sir Alex Ferguson er mjög sérstök manneskja. Honum var veitt öryggi og traust til að byggja upp arfleið sína hjá Manchester United. Ég hef trú á því að við séum sérstakir og við getum byggt eitthvað svipað hér. Þetta félag er sérstakt,“ sagði Pochettino.